Vín vikunnar hjá okkur að þessu sinni er Pazo Das Bruxas frá spænsku víngerðinni Torres.
Um birgjann: Spænski léttvínsframleiðandinn Torres er Íslendingum að góðu kunnur, enda hafa Torres vín verið fáanleg hérlendis um áratuga skeið. Á dögunum var Torres valinn virtasti vínbirgi heims af fagmönnum í vínbransanum, en það er breska tímaritið Drinks International sem stendur árlega fyrir uppsetningu listans. Gerðum við þessu vali góð skil á heimasíðu okkar á dögunum og verður hér vitnað í þá grein.
Annað árið í röð trónir Torres á toppi lista breska víntímaritsins Drinks Internatinal yfir virtustu víngerðir heims og er eina spænska og evrópska víngerðin sem hefur setið á toppnum þau sjö ár sem hann hefur verið tekinn saman.
Listinn er settur saman með því að fá álit yfir 100 sérfræðinga í vínfræðum (blaðamenn, vínþjónar, bloggarar, kennarar) sem beðnir eru um að velja þær þrjár víngerðir sem þeir dást mest að. Sérstaklega er litið til eftirfarandi þátta:
- Vín framleiðandans halda eða bæta gæði sín milli ára.
- Vínin endurspegla einkenni upprunasvæðis og/eða upprunalands.
- Vínin taka mið af þörfum og væntingum kaupenda.
- Umbúðir, pakkningar og markaðssetning.
- Vínin höfða til breiðs hóps neytenda.
Listinn er með öllu óháður; framleiðendur geta ekki keypt sig inn á listann, enda er það langt í frá sjálfgefið að stærstu vínframleiðendurnir rati á listann.
En hver er ástæðan fyrir að Torres tróni á toppnum ár eftir ár? Umsagnir dómnefndar voru m.a. eftirfarandi:
„Torres er leiðandi í öllum þáttum bransans, frá vínræktuninni og víngerðinni til markaðssetningar, svo ekki sé minnst á umhverfissþáttinn“.
„Einn af fáum vínframleiðendum sem leggur mikla áherslu á að fjárfesta í rannsóknum og þróun á hverju einasta ári“.
„Torres er vörumerki þar sem þú veist að þú ert að fá mikil gæði í hverjum verðflokki, ekki síst í premium línunni, og heldur áfram að vera framleiðandi með mikla fjölskylduhefð þar sem gæðin eru umfram öllu“.
Um vínið: Pazo Das Bruxas er fáanlegt í fyrsta skiptið hérlendis í vínbúðum frá og með 1. maí. Um er að ræða hvítvín sem er 100% af Albariño þrúgunni.
Samkvæmt Galískum þjóðsögum hittust nornir (bruxas) reglulega í afkekktum sveitahúsum (Pazos) þar sem þær mögnuðu seiði með dansi og áfengu víni. Þaðan er nafnið fengið, en samkvæmt öruggum heimildum eru það góðar nornir sem prýða þennan miða og á það að boða góða lukku að dreypa á þessu göldrótta víni.
Vínið sjálft er gyllt á lit með grænum tónum og ber með sér einkenni Albariño þrúgunnar í bragði sem oft eru vínber, sítróna og blóm. Margslungið í nefi.
Vínið nýtur sín vel eitt og sér sem fordrykkur en parast vel með hvítum fiski og geitaosti.
Vínið er fáanlegt í fjórum verslunum Vínbúða.
Til að fá upplýsingar um tilboð á víni vikunnar getur þú skráð þig í vínklúbbinn okkar
